ਦਸਤਾਰ ......ਹਰਨੇਕ ਕਲੇਰ

ਐਵੇਂ ਤਾਂ ਨੀ ਦੁਨੀਆ ਤੇ ਸਰਦਾਰ ਕਹਾਉਂਂਨੇ  ਆਂ।
ਕਲਗੀਧਰ ਦੀ ਬਖਸ਼ੀ ਹੋਈ ਦਸਤਾਰ ਸਜਾਉਂਨੇ ਆਂ।
ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ,ਰਲਕੇ ਓਟ ਧਿਆਉਂਨੇ ਆਂ ।
ਹਰ ਕੰਮ ਕਰਨ ਤੋਂ ਪਹਿਲਾਂ ਨਾਨਕ ਨਾਮ ਧਿਆਉਂਨੇ ਆਂ।
ਕਰਤਾ ਪੁਰਖ ਤੋਂ ਬਿਨਾ,
ਅਸੀਂ ਹੋਰ ਕਿਸੇ ਤੋਂ ਡਰਦੇ ਨਹੀਂ।
ਜ਼ੁਲਮ ਕਿਸੇ ਤੇ ਹੁੰਦਾ ਦੇਖ ,ਅਸੀਂ ਕਦੇ ਵੀ  ਜਰਦੇ ਨਹੀਂ।
ਹੱਦ ਜ਼ੁਲਮ ਦੀ ਜੇ ਹੋ ਜਾਵੇ ਤਾਂ ,ਤਲਵਾਰ ਉਠਾਉਂਨੇ ਆਂ।
ਕਲਗੀਧਰ ਦੀ ਬਖਸ਼ੀ ਹੋਈ ਦਸਤਾਰ ਸਜਾਉਂਨੇ ਆਂ।
ਬਾਬਰ ਜਾਬਰ ਜਦ,ਭਾਰਤ ਵਿਚ,ਕਹਿਰ ਕਮਾਇਆ ਸੀ।
ਰਾਜੇ ਸ਼ੀਂਹ ਮੁਕੱਦਮ ਕੁੱਤੇ,ਆਖ ਗੁਰੂ ਨਾਨਕ ਨੇ ਰੋਹ ਜਗਾਇਆ ਸੀ।
ਗੁਰੂ ਅੰਗਦ ਨੇ ਮੱਲ ਅਖਾੜੇ, ਜੀਵਨ ਜੁਗਤ ਬਣਾ ਦਿੱਤੇ ।
ਗੁਰੂ ਅਮਰ ਦਾਸ ਨੇ, ਸੇਵਾ ਤੇ ਸਿਮਰਨ ਦੇ ਮਾਰਗ ਤੇ ਪਾ ਦਿੱਤੇ।
ਅੰਮ੍ਰਿਤਸਰ, ਗੁਰੂ ਰਾਮਦਾਸ ਦੀ ਨਗਰੀ ਦੇ
ਦਰਸ਼ਨ ਪੌਂਨੇ ਆਂ।
ਕਲਗੀਧਰ ਦੀ ਬਖਸ਼ੀ ਹੋਈ ਦਸਤਾਰ ਸਜਾਉਂਨੇ ਆਂ।
ਗੁਰੂ ਅਰਜਨ ਦੇਵ ਨੇ, ਤਪਦੀ ਲੋਅ ਨੂੰ ਸੀਤ ਬਣਾਇਆ ਸੀ ।
ਛੇਵੇਂ ਪਾਤਸ਼ਾਹ ਮੀਰੀ ਪੀਰੀ ਦਾ, ਮਾਰਗ ਸਮਝਾਇਆ ਸੀ।
ਹਰਿਮੰਦਰ ਦੇ ਚੌਂਹ ਦਰਵਾਜ਼ੇ, ਗੁਰਮਤਿ ਦੀ ਗੱਲ ਸਮਝਾਉਂਦੇ ਨੇ।
ਤਾਹੀਂ ਕੁੱਲ ਦੁਨੀਆ ਦੇ ਲੋਕੀ,ਇੱਥੇ ਆ ਕੇ
ਸੀਸ ਝੁਕਾਉਂਦੇ ਨੇ।
ਗੁਰੂ ਹਰਿ ਰਾਏ ਦੇ ਕੋਮਲ ਹਿਰਦੇ ਦੀਆਂ
ਬਾਤਾਂ ਪਾਉਂਦੇ ਆਂ।
ਕਲਗੀਧਰ ਦੀ ਬਖਸ਼ੀ ਹੋਈ ਦਸਤਾਰ ਸਜਾਉਂਨੇ ਆਂ।
ਅੱਠਵੇਂ ਗੁਰੂ ਹਰਿਕਿਸ਼ਨ ਨੇ ਗੂੰਗੇ ਤੋਂ ਗੀਤਾ ਪੜ੍ਹਵਾਈ ਸੀ।
ਨੌਂਵੇਂ ਗੁਰੂ ਤੇਗਬਹਾਦਰ ਡੁਬਦੀ ਹੋਈ, ਹਿੰਦ ਬਚਾਈ ਸੀ।
ਦਸਵੇਂ ਪਾਤਸ਼ਾਹ ਖੰਡੇ ਬਾਟੇ ਦਾ,ਅੰਮ੍ਰਿਤ ਪਾਨ ਕਰਾ ਦਿੱਤਾ।
ਇਕ ਇਕ ਸਿੰਘ ਨੂੰ,ਸਵਾ ਲੱਖ ਦੇ ਨਾਲ ਲੜਾ ਦਿੱਤਾ।
ਕਲੇਰ ਲੱਖਾਂ ਦੇ ਵਿਚ ਖੜ੍ਹੇ ਵੀ ਸਭਨੂੰ,ਨਜ਼ਰੀਂ ਔਂਨੇ ਆਂ।
ਕਲਗੀਧਰ ਦੀ ਬਖਸ਼ੀ ਹੋਈ ਦਸਤਾਰ ਸਜਾਉਂਨੇ ਆਂ।