ਵਿਹੜੇ ਬਾਬਲ ਦੇ......Dr.Harnek Singh Kaler

ਮੈਂ ਤੈਥੋਂ ਜਿੰਦ ਵਾਰ ਦਿਆਂਗੀ,
ਤੂੰ ਮੈਥੋਂ ਜਿੰਦ ਵਾਰੀ।
ਹਿੰਮਤ ਜਰਾ ਦਿਖਾ ਤੂੰ ਮਾਏ।
ਔਰਤ ਹੈ ਕਦ ਹਾਰੀ।
ਵਿਹੜੇ ਬਾਬਲ ਦੇ,
ਸੁਣ ਮੇਰੀ ਕਿਲਕਾਰੀ।
ਤੇਰੀ ਗੋਦ ਪਿਆਰੀ ਮੰਗਾਂ।
ਚੁੰਨੀ ਤੇ ਫੁੱਲਕਾਰੀ ਮੰਗਾਂ।
ਬੋਹੜ,ਪਿੱਪਲਾਂ ਵਰਗੀ ਚਾਹਾਂ,
ਤੇਰੀ ਛਾਂ ਪਿਆਰੀ। ਵਿਹੜੇ ਬਾਬਲ ਦੇ..
ਕੁੱਖ ਵਿਚ ਨਾ ਮਾਰ ਮੁਕਾਈਂ।
ਸਭ ਨੂੰ ਤੂੰ ਇਹੋ ਸਮਝਾਈਂ।
ਧੀ ਹੁੰਦੀ ਐ ਬਾਬਲ ਵਿਹੜੇ,
ਫੁੱਲਾਂ ਭਰੀ ਕਿਆਰੀ। ਵਿਹੜੇ ਬਾਬਲ ਦੇ..
ਧੀ ਦਾ ਮੋਹ ਨਾ ਕਦੇ ਵਿਸਾਰੀਂ।
ਐਸਾ ਇਕ ਸਮਾਜ ਉਸਾਰੀਂ।
ਜੀਵਨ ਜਾਚ ਸਿਖਾਦੀਂ ਅੰਮੀਏ,
ਮੈਂ ਤੇਰੇ ਬਲਿਹਾਰੀ।ਵਿਹੜੇ ਬਾਬਲ ਦੇ..
ਦੁੱਖ ਸੁਖ ਤੇਰਾ ਰਹੂੰ ਵੰਡਾਉਂਦੀ।
ਮੋਢੇ ਦੇ ਨਾਲ ਮੋਢਾ ਲਾਉਂਦੀ।
ਅੱਜ ਨਾ ਹਾਰੀ ਮਾਂ ਤੈਨੂੰ ਮੈਂ
ਜਿੱਤ ਦੂੰ ਦੁਨੀਆ ਸਾਰੀ।ਵਿਹੜੇ ਬਾਬਲ ਦੇ..
ਮੈਨੂੰ ਸੀਨੇ ਦੇ ਨਾਲ ਲਗਾ ਕੇ।
ਧੀ ਪੁੱਤ ਦਾ ਫਰਕ ਮਿਟਾ ਦੇ ।
ਕਲੇਰ ਸਦਾ ਅਖਵਾਉਂਦੀ ਰਹਿਜਾ,
ਮਾਂ ਦੀ ਧੀ ਪਿਆਰੀ।ਵਿਹੜੇ ਬਾਬਲ ਦੇ..।
ਹਰਨੇਕ ਕਲੇਰ